Brunda

CATI PIRU CA TI MANGIU
(Avv. E. MASIELLO)

Sarà lu faugnu ca ‘nfoca li strati,
lu friddu ti ‘nviernu, lu soli ti stati,
sarà na miseria ca no si capisci,
sarà la malaria…Ma comu mi ‘ncresci!
Mi ‘ncresci cu mbevu, mi ‘ncresci cu mangiu,
cu dormu, cu m’azu, cu cangiu e scangiu,
cu ritu, cu chiangu, cu mi ‘nnammoru;
mi ‘ncresci cu campu, e mi ‘ncresci cu moru!
Po’ darsi ca è viziu o è malatia,
ma quantu mi puzza a me la fatia.

Ca po’, ci nci piensi, quant’anni ha campari?
Lu tiempu ca passa, lu pierdi a fatiari?
Ci l’acqua mi bbagna, lu soli mi ‘ssuca.
No mi ‘llittichesciu, no fazzu vilenu;
ci si pò scanzari, facimmini a menu,
ca tanta, ti ‘mbili, ti lemba o ti brocca,
ogni acqua ca corri, a mari li tocca!

Ci nquarche furastieru si mena a fatiàri,
ma ce vi ni futta? lassatulu fari!
No servi la ugghina, no occorri la mazza,
ma basta lu tiempu, puru iddu si 'ncazza!

Mai sta cu la pressa! Vagnù, chianu chianu!
Ma ce vi pinzati, ca stamu a Milanu?
Ma ce “evoluzioni”, ma quali “procressu”!
A ddo' nui tanta, si campa lu stessu.

Sarà la faugnu? Sarà l’aria toci?
Lu cielu, lu mari, stu soli ca coci?
Sarà la miseria? Sarà la malaria?
Sarà can ci sta, nquarche cosa ntral’aria?
Certu è ca: li mazzi, li cruessi, li tritti, li stuerti,
li bueni, li fessi, li vivi e li muerti; li beddi li brutti, li cani e li jatti; a ddo nui tutti cussi simu fatti!

Grande Ennio